ខែលការពារដំបូងរបស់រាងកាយអ្នក៖ ប្រព័ន្ធភាពស៊ាំ

ប្រព័ន្ធភាពស៊ាំ គឺជាប្រព័ន្ធការពាររាងកាយរបស់អ្នក ដែលធ្វើការឥតឈប់ឈរដើម្បីការពារអ្នកពីមេរោគ វីរុស និងការឆ្លងជំងឺផ្សេងៗ។ វាមានបណ្តាញស្មុគស្មាញនៃកោសិកា ជាលិកា និងសរីរាង្គ ដែលធ្វើការរួមគ្នាដើម្បីកំណត់អត្តសញ្ញាណ និងកម្ចាត់ហានិភ័យទាំងឡាយ និងរក្សាបាននូវសុខភាពល្អចំពោះរាងកាយ។

ប្រព័ន្ធភាពស៊ាំអាចរងផលប៉ះពាល់ដោយកត្តាជាច្រើន រួមមានអាយុ ភាពតានតឹង អាហារូបត្ថម្ភ និងអ្វីដែលគួរឱ្យភ្ញាក់ផ្អើលនោះគឺ សុខភាពសាច់ដុំ! តាមពិតទៅ ការបាត់បង់ម៉ាសសាច់ដុំត្រឹមតែ 10% ក៏អាចធ្វើឱ្យប្រព័ន្ធភាពស៊ាំចុះខ្សោយបានដែរ¹។

ការថែរក្សាប្រព័ន្ធភាពស៊ាំឱ្យរឹងមាំ ទាមទារឱ្យមានការថែទាំ និងការយកចិត្តទុកដាក់ការពារជាមុន! ត្រង់ចំណុចនេះហើយ ដែលវិធីសាស្រ្តចម្រុះនៃការធ្វើលំហាត់ប្រាណទៀងទាត់ និងអាហារូបត្ថម្ភល្អ រួមទាំងការទទួលបាននូវសារធាតុចិញ្ចឹមដែលជួយដល់ប្រព័ន្ធភាពស៊ាំ (ដូចជា វីតាមីន C E និងស័ង្កសី) អាចជួយបាន។ ការសិក្សាវិទ្យាសាស្ត្រថ្មីៗក៏បានបង្ហាញផងដែរថា សារធាតុផ្សំមានមុខងារដូចជា យីស បេតា-គ្លុយខេន (Yeast Beta Glucan) ក៏អាចមានប្រយោជន៍ផងដែរ ក្នុងការជួយដាស់ប្រព័ន្ធភាពស៊ាំរបស់អ្នក ដើម្បីពង្រឹងការការពាររាងកាយ។

ប្រព័ន្ធភាពស៊ាំរឹងមាំ ចាប់ផ្តើមពីអាហារូបត្ថម្ភល្អ

របបអាហារពេញលេញ និងមានតុល្យភាព ដើរតួនាទីយ៉ាងសំខាន់ក្នុងការទ្រទ្រង់មុខងាររបស់រាងកាយ និងប្រព័ន្ធភាពស៊ាំរបស់អ្នក។ ក្នុងករណីដែលមានការលំបាកក្នុងការទទួលបានសារជាតិចិញ្ចឹមចាំបាច់តាមរយៈរបបអាហារ ផលិតផលអាហារបំប៉ន់ដែលអាចទទួលទានបាន (Oral Nutritional Supplements) អាចមានប្រយោជន៍ក្នុងការបំពេញបន្ថែមនូវសារជាតិចិញ្ចឹមដែលខ្វះខាតទាំងនោះ។  

• ការណែនាំអំពីសារធាតុដាស់ប្រព័ន្ធភាពស៊ាំ - យីស បេតា-គ្លុយខេន

យីស បេតា-គ្លុយខេន (Yeast Beta Glucan - YBG) គឺជាកាបូអ៊ីដ្រាតស្មុគស្មាញម្យ៉ាងដែលមានពីធម្មជាតិ ដែលជាប្រភេទនៃជាតិសរសៃ។ យីស បេតា-គ្លុយខេន នេះត្រូវបានគេចម្រាញ់ចេញពីភ្នាសកោសិការបស់មេនំប៉័ង ដែលត្រូវបានគេស្គាល់តាមបែបវិទ្យាសាស្ត្រថា Saccharomyces cerevisiae¹។

យីស បេតា-គ្លុយខេន “ដាស់” កោសិកាប្រព័ន្ធភាពស៊ាំ ដោយធ្វើឱ្យកោសិកាការពាររាងកាយផ្សេងៗសកម្ម និងបង្កើនសមត្ថភាពរបស់វា*^2-5។ បន្ទាប់មកវាជួយទ្រទ្រង់ដល់ការឆ្លើយតបនៃប្រព័ន្ធភាពស៊ាំដ៏រឹងមាំ ដើម្បីប្រឆាំងនឹងការឆ្លងមេរោគ និងជំរុញសុខភាពប្រព័ន្ធភាពស៊ាំទាំងមូល។

ការសិក្សាស្រាវជ្រាវបែបគ្លីនិកបានបង្ហាញថា នៅពេលដែល យីស បេតា-គ្លុយខេន ត្រូវបានបញ្ចូលទៅក្នុងរបបអាហារ វាជួយកាត់បន្ថយអត្រានៃការកើតមាននូវរោគសញ្ញានៃការឆ្លងមេរោគផ្លូវដង្ហើមផ្នែកខាងលើ (URTIs)^3,4។ បុគ្គលមួយចំនួន ជាពិសេសអ្នកដែលងាយឆ្លងមេរោគ URTIs ជាងគេ មានករណីកើតជំងឺនេះតិចជាងមុន ហើយក៏មិនសូវធ្ងន់ធ្ងរផងដែរ

• ទទួលយកនូវប្រូតេអ៊ីន និងសារធាតុចិញ្ចឹមសម្រាប់ប្រព័ន្ធភាពស៊ាំរបស់អ្នក

ប្រូតេអ៊ីន៖ ក្រៅពីជាសារជាតិចិញ្ចឹមដ៏សំខាន់សម្រាប់ការកសាងសាច់ដុំ ប្រូតេអ៊ីនក៏ជាសារជាតិចិញ្ចឹមសំខាន់មួយសម្រាប់ការផលិតអង្គបដិប្រាណ (Antibodies) និងកោសិកាប្រព័ន្ធភាពស៊ាំ ដើម្បីទ្រទ្រង់ប្រព័ន្ធភាពស៊ាំផងដែរ។ 

សារជាតិចិញ្ចឹមសម្រាប់ប្រព័ន្ធភាពស៊ាំ៖ សូមជ្រើសរើសអាហារដែលសម្បូរទៅដោយ វីតាមីន A B6 B12 C D ទង់ដែង ហ្វូឡេត ជាតិដែក ស័ង្កសី និងសេឡេញ៉ូម ដើម្បីទ្រទ្រង់មុខងារប្រព័ន្ធភាពស៊ាំ។ 

សូមពិចារណាការប្រើប្រាស់អាហារូបត្ថម្ភពេញលេញ និងមានតុល្យភាព៖ 
សម្រាប់បុគ្គលដែលទទួលទានអាហារមិនបានគ្រប់គ្រាន់ ហើយមានការលំបាកក្នុងការទទួលបានតម្រូវការអាហារូបត្ថម្ភតាមរយៈអាហារតែម៉្យាង ការប្រើប្រាស់ផលិតផលអាហារបំប៉នដែលពេញលេញ និងមានតុល្យភាព ចំនួន 1 ទៅ 3 កែវ ជាផ្នែកមួយនៃរបបអាហារប្រចាំថ្ងៃ អាចមានអត្ថប្រយោជន៍ច្រើន។ អាហារបំប៉នទាំងនេះផ្តល់នូវសារជាតិចិញ្ចឹមសំខាន់ៗ រួមមាន ប្រូតេអ៊ីន វីតាមីន និងសារធាតុរ៉ែ ដើម្បីទទួលបានអាហារូបត្ថម្ភល្អ។ 

ក្រៅពីការទ្រទ្រង់ប្រព័ន្ធភាពស៊ាំ អាហារូបត្ថម្ភល្អក៏អាចផ្តល់អត្ថប្រយោជន៍ដល់សុខភាពសាច់ដុំរបស់អ្នកផងដែរ!

បំពេញបន្ថែមដល់ការថែទាំប្រព័ន្ធភាពស៊ាំរបស់អ្នក ជាមួយនឹងការរស់នៅប្រកបដោយភាពសកម្ម និងសុខភាពល្អ ដែលជួយជំរុញសុខភាពសាច់ដុំ

បន្ថែមពីលើអាហារូបត្ថម្ភល្អ សូមអនុវត្តរបៀបរស់នៅដែលមានសុខភាពល្អ ដែលរួមមានការធ្វើលំហាត់ប្រាណទៀងទាត់ ទម្លាប់នៃការគេងឱ្យបានល្អ និងការចៀសវាងការជក់បារី និងការទទួលទានគ្រឿងស្រវឹង។ 

សាច់ដុំរឹងមាំមានទំនាក់ទំនងជាមួយការសម្រួលប្រព័ន្ធភាពស៊ាំ។ ដោយផ្អែកលើភស្តុតាងនៃទំនាក់ទំនងរវាងសាច់ដុំ និងប្រព័ន្ធភាពស៊ាំ ការថែរក្សា ឬការបង្កើនសុខភាពសាច់ដុំគួរតែជារឿងអាទិភាព។ ជាមួយនឹងអាហារូបត្ថម្ភល្អ ការអនុវត្តរបបលំហាត់ប្រាណទៀងទាត់អាចជួយលោកអ្នករក្សា និងស្តារទំហំសាច់ដុំដែលបាត់បង់ឡើងវិញ ដើម្បីរក្សាសុខភាពសាច់ដុំឱ្យស្ថិតក្នុងសភាពល្អបំផុត។

ការចូលរួមក្នុងសកម្មភាពដែលទាមទារការប្រើកម្លាំងច្រើន ដូចជាការហ្វឹកហាត់ប្រាណដោយប្រើកម្លាំងទប់ទល់ (Resistance training) ហាត់យូហ្កា ឬសូម្បីតែសកម្មភាពសាមញ្ញដូចជាការឡើងជណ្តើរ ក៏អាចផ្តល់ឱ្យរាងកាយនូវសកម្មភាពដែលវាត្រូវការបានដែរ។ ការបន្ថែមលំហាត់ប្រាណប្រើកម្លាំងទប់ទល់ (ឧទាហរណ៍៖ ការទាញខ្សែយឺត ឬលើកដុំដែក) ទៅក្នុងទម្លាប់ហាត់ប្រាណរបស់អ្នក អាចផ្តល់អត្ថប្រយោជន៍ក្នុងការជួយពង្រឹងភាពស៊ាំ ក៏ដូចជាបង្កើនទំហំសាច់ដុំ ធ្វើឱ្យកម្លាំង និងមុខងារកាន់តែប្រសើរឡើង។

សូមចងចាំថា ការផ្តល់អាទិភាពដល់សុខភាពប្រព័ន្ធភាពស៊ាំរបស់អ្នក មិនមែនជាការខិតខំប្រឹងប្រែងតែមួយដងនោះទេ ប៉ុន្តែជាការប្តេជ្ញាធ្វើជាប្រចាំមួយជីវិត។ តាមរយៈការតាំងចិត្តខ្ពស់ និងវិធីសាស្ត្រច្រើនយ៉ាង អ្នកពិតជាអាចបញ្ចេញថាមពលពេញលេញនៃប្រព័ន្ធភាពស៊ាំរបស់អ្នក និងរក្សាសុខភាពឱ្យនៅរឹងមាំជានិច្ច!